Марказий банк ва Жаҳон банки экспертлари ўртасида жиноий фаолиятдан олинган даромадларни легаллаштириш ва терроризмни молиялаштиришга қарши курашиш (ЖФОДЛ/ТМҚК) соҳасида амалга оширилаётган ишларни муҳокама қилишга қаратилган видеоконференция бўлиб ўтди.
Учрашувда Марказий банк томонидан банк тизими миллий баҳолашдан ўтказилганлиги, рискга асосланган назорат методологияси янгиланганлиги ва келгусида янада ривожлантирилиши қайд этилди.
Жаҳон банки ушбу соҳада Марказий банк амалга ошираётган тадбирларни қўллаб-қувватлади. Томонлар Жаҳон банкининг ЖФОДЛ/ТМҚК йўналишида қонунбузарликлар даражасини баҳолаш методологияси қўлланилишида, шунингдек, тўлов тизимлари, электрон пул эмитентлари ва нобанк кредит ташкилотлари учун назоратни янада кучайтириш бўйича техник ёрдам кўрсатишига келишиб олдилар.
