Марказий банк вакилларидан иборат Ишчи гуруҳ Сирдарё вилоятида тадбиркорлар билан учрашиб, уларнинг фаолияти билан яқиндан танишди.
Юзма-юз мулоқотларда тадбиркорларни қийнаётган муаммолар, Сирдарё вилояти ижтимоий-иқтисодий ривожлантириш дастурлари ижроси, пул тушумлари камайган корхоналар фаолиятини тиклаш, аҳолини иш билан таъминлашга алоҳида эътибор қаратилди.
Ташриф давомида Ишчи гуруҳ томонидан кредит маблағлари ажратилиши кечикаётган лойиҳаларни молиялаштириш, айланма маблағларни тўлдириш учун кредит маблағларига эҳтиёжи бўлган тадбиркорларни молиявий қўллаб-қувватлаш, банк хизматларига доир барча масалалар тижорат банклари раҳбарлари иштирокида бирма-бир ўрганилди ҳамда аксарияти жойида ҳал этилди.
Келгусида ҳудудни янада ривожлантириш ва вужудга келиши мумкин бўлган хатарларнинг олдини олиш бўйича зарурий амалий чоралар белгилаб олинди.