Бош саҳифа > Банк тизимига оид қонун ҳужжатлари > Давлат дастурлари > 2011 йил - "Кичик бизнес ва хусусий тадбиркорлик йили" >

O`zLiDeP ва Марказий банк матбуот анжумани ўтказди

«Пойтахт» бизнес марказида Тадбиркорлар ва ишбилармонлар ҳаракати - Ўзбекистон Либерал-демократик партияси Сиёсий Кенгаши Ижроия қўмитаси ва Ўзбекистон Республикаси Марказий банкининг қўшма матбуот анжумани бўлиб ўтди.

Унда Ўзбекистон Республикаси Олий Мажлис Қонунчилик палатаси депутатлари, O`zLiDeP Сиёсий Кенгаши Ижроия қўмитаси аъзолари, Марказий банк ва тижорат банклари раҳбарлари, тадбиркорлар ва фермерлар иштирок этди.

Таъкидландики, Ўзбекистон мустақил ривожланишининг бутун даври мобайнида олиб борилаётган ислоҳотларнинг муҳим устиворликлари бу демократик жамият асоси сифатида мулкдорлар ўрта синфини шакллантириш ва янада ривожлантириш бўлиб қолмоқда. Кичик бизнес ва хусусий тадбиркорлик жамиятда ижтимоий-иқтисодий барқарорликнинг кафолати ва таянчи ҳамда мамлакатимиз тараққиёти йўлидаги фаол ҳаракатлантирувчи кучдир.

Ўзбекистонда имкон қадар мақбул шароитлар ва ишчан муҳит, имтиёзлар ва афзалликлар яратиш, кичик бизнес ва хусусий тадбиркорликни жадал ривожлантириш учун ҳар томонлама кўмак бериш, уларнинг мамлакат иқтисодиётидаги улушини ошириш бўйича тизимли ва изчил чора-тадбирлар амалга оширилмоқда. Мазкур соҳани жадал суръатлар билан ривожлантириш ички бозорни рақобатбардош ва сифатли маҳсулотлар билан тўлдириш, биринчи навбатда ёшлар учун янги иш ўринлари яратиш, шу асосда аҳоли даромадлари ва фаровонлигини оширишга хизмат қилади.

Мамлакатимиз Президенти И.Каримов томонидан ишлаб чиқилган мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш Концепциясидаги устиворликларни ҳамда "Кичик бизнес ва хусусий тадбиркорлик йили” Давлат дастурини амалга ошириш сифат жиҳатдан янги иқтисодий ҳуқуқий шароитларни ҳамда кичик бизнес ва хусусий тадбиркорлик учун қулай имкониятларни вужудга келтирмоқда.

Кези келганда айтиш ўринлики, 2011 йилнинг 4 ойи давомида тижорат банклари томонидан кичик бизнес ва хусусий тадбиркорлик субъектларига ажратилган кредитлар ҳажми 2010 йилнинг шу даврига нисбатан 1,4 баробар ошиб, 1,1 трлн. сўмдан ва нобанк кредит ташкилотлари томонидан ажратилган кредитлар ҳажми 108 млрд. сўмдан ортиқ миқдорни ташкил этди.

Кредитлар ажратилишида "Кичик бизнес ва хусусий тадбиркорлик йили“ Давлат дастурида белгиланган вазифалар ижросини таъминлашга алоҳида эътибор қаратилмоқда. Жумладан:

- озиқ-овқат истеъмол товарлари ишлаб чиқарувчиларга 224,2 млрд. сўм;

- хизмат кўрсатиш ва сервис соҳасини ривожлантириш учун 114,5 млрд.сўм;

- касб-ҳунар коллежлари битирувчиларига ўз бизнесини ташкил этишлари учун 5,5 млрд. сўмдан  ортиқ имтиёзли микрокредитлар;

- оилавий тадбиркорлик ва ҳунармандчиликни ривожлантириш учун тадбиркорлик субъектларига 5,5 млрд. сўм миқдорида имтиёзли кредитлар ажратилди.

Шунингдек, кичик бизнес ва хусусий тадбиркорлик субъектларининг инвестицион лойиҳаларини молиялаштиришга халқаро молия институтларининг 30,4 млн. АҚШ доллари миқдорида кредит маблағлари йўналтирилди.

Давлат дастурида банк тизими олдига қўйиладиган вазифаларнинг ижросини ўз вақтида ва тўлиқ бажарилишини таъминлаш, тадбиркорлик субъектларига янада қулайликлар яратиш мақсадида, тижорат банкларининг барча филиалларида “Тадбиркорлар хонаси” ташкил этилди. Уларда малакали мутахассислар томонидан ишбилармонларга кредитлар ажратиш, банк хизматлари кўрсатиш, бизнесни йўлга қўйиш ва янада кенгайтириш юзасидан зарур маслаҳатлар бериб борилмоқда.

Шунингдек, филиаллар ва мини банкларда ташкил этилган “Тадбиркорлар бурчаги” орқали республикамизда кичик бизнес ва хусусий тадбиркорликни ривожлантириш борасида яратилган шарт-шароитлар, имкониятлар, таклиф этилаётган янги банк хизматлари тўғрисида узлуксиз равишда ахборот бериб борилиши йўлга қўйилди. Банкларнинг мунтазам янгиланиб бориладиган веб-сайт ва порталлари орқали ахборот хизмати кўрсатиш тизими кенгайтирилди.

O`zLiDeP ва Марказий банк юқорида айтилган йўналишлар бўйича қатор лойиҳаларни амалга оширмоқда. Хусусан, лойиҳалар доирасида кичик бизнес ва хусусий тадбиркорлик субъектларини кредитлаш механизмларини янада такомиллаштириш ва ҳажмларини ошириш, уларнинг бошланғич сармоясини шакллантириш, ҳуқуқий маданияти ва бизнес кўникмаларини юксалтиришга кўмаклашиш соҳасига алоҳида эътибор қаратилмоқда.

Республикамизнинг энг чекка қишлоқ ва чегарадош туманларида “Кичик бизнес ва хусусий тадбиркорликни қўллаб-қувватлаш - аҳоли фаровонлигини ошириш омили” мавзуида туркум семинарлар ўтказилмоқда. Улар асосан тадбиркорлик фаолиятини жадаллаштириш ва аҳоли бандлигига оид масалаларни ҳал этишга кўмаклашишга қаратилган. Уларда 11 мингдан ортиқ тадбиркорлар, фермерлар, ўқув юртлари битирувчилари ва аёллар иштирок этишди.

Банк тузилмалари томонидан кичик бизнес ва хусусий тадбиркорлик вакиллари учун мақбул шароитларни яратиш, бизнесни йўлга қўйиш ва самарали бошқариш, ушбу мақсадларда бошланғич капитални шакллантириш бўйича долзарб масалалар ва вазифалар муҳокама этилмоқда. Тадбир иштирокчиларига банк-молия тузилмалари томонидан қўлланилаётган кўргазмали намунали бизнес-лойиҳалар, кредитларни олиш учун таклифларни ишлаб чиқиш, керакли ҳужжатларни расмийлаштириш бўйича тавсиялар тақдим этилмоқда ва бошқа маслаҳатлар берилмоқда.

Тадбирлар давомида 500 дан ортиқ тадбиркорга ўз бизнесини йўлга қўйиш ва кенгайтириш учун қарийб 7 млрд. сўмлик имтиёзли кредит олиш ҳуқуқини берувчи сертификатлар топширилди.

Шунингдек, аҳоли бандлигини таъминлаш ва унинг фаровонлигини оширишнинг муҳим йўналишлари сифатида ёшларни инновацион ривожланиш, кичик бизнес ва хусусий тадбиркорлик соҳасига кенг жалб қилишга қаратилган «Диплом билан - бизнесга» каби лойиҳалар амалга оширилмоқда. Қайд этилган лойиҳаларда ҳозирга қадар 1500 нафардан зиёд коллеж ва олий ўқув юртлари битирувчилари, 1000 нафардан ортиқ тадбиркор ва фермерлар, аёллар иштирок этди. Тижорат банклари оилавий бизнес, касаначилик, ҳунармандчиликни ривожлантириш борасидаги қарийб 200 бизнес-режани қўллаб-қувватлашга тайёрлиги билдирилди.

Анжуманда таъкидландики, Марказий банк ва тижорат банкларининг партия ташкилотлари билан ҳамкорлиги «Банклар – тадбиркорларнинг ҳамкори ва ишончли таянчи» ғоясини ҳаётга изчил тадбиқ этишда, банк-молия муассасалари томонидан тадбиркорлик ташаббуслари ва O`zLiDeP электорати лойиҳаларини қўллаб-қувватлашда амалий аҳамият касб этади.

Анжуман қатнашчилари, шунингдек, банклар томонидан ташкил этилган инновацион банк хизматлари кўргазмаси билан танишдилар.