Бош саҳифа > Банк тизимига оид қонун ҳужжатлари > Давлат дастурлари > 2011 йил - "Кичик бизнес ва хусусий тадбиркорлик йили" >

Тадбиркорлик ривожи учун катта имкониятлар

Ўзбекистон Марказий банки ташаббуси билан Нукусда қорақалпоғистонлик тадбиркорлар иштирокида учрашув бўлиб ўтди.

Очиқ мулоқот тарзида ташкил этилган анжуманда асосан кичик бизнес ва хусусий тадбиркорликни янада ривожлантириш учун қулай ишбилармонлик муҳитини шакллантириш, бюрократик тўсиқларни бартараф этиш ва тадбиркорлик фаолияти эркинлигини янада ошириш, кичик бизнес ва хусусий тадбиркорлик субъектларига яратилган имтиёз ва имкониятлар хусусида сўз юритилди.

«Кичик бизнес ва хусусий тадбиркорлик йили»да соҳани ҳар томонлама қўллаб-қувватлаш ва унинг мамлакат иқтисодиётидаги аҳамиятини ошириш борасида муҳим қадамлар қўйилди.

Бунинг ёрқин мисолини тадбиркорлик субъектларига ажратилаётган кредитлар, шу жумладан кўрсатилаётган микромолиявий хизматлар ҳажмининг жадал суръатларда ўсишида кўриш мумкин. Хусусан, Қорақалпоғистон Республикасида 2011 йил 8 ойи давомида тижорат банклари томонидан кичик бизнес ва хусусий тадбиркорлик субъектларига ажратилган кредитлар миқдори ўтган йилга нисбатан 1,5 баробар ўсиб, 104,4 млрд. сўмга етди. Шундан, 22,6 млрд. сўмини соҳа субъектларига ажратилган микрокредитлар ташкил этиб, 2010 йилга таққосланганда 1,6 баробар ўсишига эришилди.

Мулоқот давомида банкирлар тадбиркорларга банк фаолиятининг янада очиқлигини ошириш ва эркинлаштириш бўйича сўнгги янгиликларни баён этишди. Хусусан, ҳозирги пайтда миллий валютада ҳисобрақами очганлиги учун кичик бизнес субъектларидан тўлов ундириш бекор қилинди; уларнинг кредитлар ажратиш ҳақидаги аризалари уч банк кунида кўриб чиқиладиган бўлди; хўжалик субъектлари томонидан савдо ва сервис соҳасида харид қилинадиган товар (иш, хизмат)лар учун корпоратив пластик карталаридан фойдаланган ҳолда тўловларни амалга оширишда тўлов терминаллари чеклари бирламчи бухгалтерлик ҳужжатларига тенглаштирилди; кичик бизнес ва хусусий тадбиркорлик субъектларига банк муассасаларига энг кам иш ҳақининг йигирма баробари миқдоригача бўлган нақд пул тушумини мустақил топшириш ҳуқуқи берилди.

Мамлакатимиз раҳбарининг "Кичик бизнес ва хусусий тадбиркорликни янада ривожлантириш учун қулай ишбилармонлик муҳитини шакллантиришга доир қўшимча чора-тадбирлар тўғрисида”ги Фармонига асосан Марказий банк, Ўзбекистон банклари ассоциацияси, тижорат банклари томонидан халқаро молия тузилмалари, хорижий жамғармалар ва банклар иштирокида Тадбиркорликни ривожлантириш бўйича кафолатлаш фондини ташкил этиш чоралари кўрилмоқда. Тузилажак Фонднинг асосий вазифаси кичик бизнес ва хусусий тадбиркорлик субъектларига тижорат банклари томонидан янги технологик ускуналар харид қилиш учун бериладиган кредитларнинг гаров билан қопланмаган қисми бўйича таъминот тақдим этишдир.

Мазкур фонд кредитларнинг қайтарилишини таъминлашда муҳим механизм вазифасини ўтайди. Фонд, шубҳасиз, янги, замонавий технологиялар асосида ишлаб чиқариш ва хизмат кўрсатишни ташкил этиш истагида бўлган минглаб тадбиркорлик субъектларининг банк кредитларидан фойдаланиш имкониятларини кенгайтиради.

Таъкидлаш ўринлики, жорий йилда тижорат банклари томонидан қорақалпоғистонлик кичик бизнес ва хусусий тадбиркорлик вакилларининг лойиҳаларини молиялаштиришга 145,8 млрд. сўм миқдорида кредитлар ажратилиши ва лизинг хизматлари кўрсатилиши режалаштирилган.

Жорий йилнинг 8 ойи давомида, озиқ-овқат истеъмол товарлари ишлаб чиқарувчи корхоналарга 12,5 млрд. сўм; хизмат кўрсатиш ва сервис соҳасини кенгайтиришга 13,0 млрд. сўм; оилавий тадбиркорлик ва ҳунармандчиликни ривожлантиришга 477,0 млн. сўм; касб-ҳунар коллежлари битирувчиларининг бизнес лойиҳаларини молиялаштиришга 617,9 млн. сўм ажратилган.

Шунингдек, халқаро молия институтларининг жалб этилган кредит линиялари ҳисобидан 236,8 минг АҚШ доллари миқдорида маблағ соҳа субъектларининг инвестицион лойиҳаларини молиялаштиришга йўналтирилди.

Қайд этиш жоизки, тадбиркорлик субъектларига инвестиция мақсадлари, ишлаб чиқаришни модернизациялаш ҳамда технологик янгилаш учун ажратилган узоқ муддатли кредитлар ҳажми 60,5 млрд. сўмдан ошиб, уларнинг соҳага тақдим қилинган жами кредитлардаги улуши 58,0 фоизни ташкил этмоқда.

Мулоқот давомида тадбиркорлар банк хизматларидан фойдаланиш имкониятлари янада кенгайгани, тижорат банклари филиалларида ташкил қилинган "Тадбиркорлар хонаси”да кредитлар ажратиш, банк хизматлари кўрсатиш, бизнесни йўлга қўйиш ва янада ривожлантириш юзасидан бепул маслаҳатлар бериб борилаётганидан мамнуният изҳор этишди.

"Кичик бизнес ва хусусий тадбиркорлик йили давлат дастури”да белгиланган вазифалар ижросининг таъминланиши ҳудудда ишбилармонлик муҳитининг тубдан яхшиланаётгани, кичик бизнес ва хусусий тадбиркорликнинг иқтисодиётдаги роли ва улушининг янада ортаётгани, аҳоли бандлигини таъминлаш ва албатта, уларнинг турмуш фаровонлиги юксалишига кенг шарт-шароитлар яратилаётганини қайд қилишди.

Анжуман иштирокчилари ўзларини қизиқтирган барча масалалар бўйича батафсил маълумотлар олдилар.