Бош саҳифа > Банк тизимига оид қонун ҳужжатлари > Давлат дастурлари > 2012 йил - "Мустаҳкам оила йили" >

Кичик бизнесга ғамхўрлик ва эътибор

Самарқанд вилоятидаги кичик бизнес ва хусусий тадбиркорлик субъектларига бу йил 317,0 млрд. сўм ҳажмида кредитлар ажратилиши режалаштирилмоқда. Бу ҳақда Самарқанд шаҳридаги Санъат коллежида ўтказилган "Тадбиркорлик - мустаҳкам оила пойдевори” мавзуида ўтказилган бизнес-форумда айтилди.

Республика Марказий банки томонидан Cамарқанд вилоят ҳокимлиги билан ҳамкорликда ташкил этилган ушбу анжуманда 500 дан ортиқ тадбиркорлик субъектлари вакиллари иштирок этди.

Форумда сўзга чиққан тижорат банклари раҳбарлари кичик бизнес ва хусусий тадбиркорликнинг жадал ривожланиши учун қулай ишбилармонлик муҳитини яратиш борасида амалга оширилаётган ишлар хусусида ахборот бердилар.

Хусусан, кичик бизнес субъектларига ҳисобрақамлар ҳақ ундирилмасдан очилиши таъминланди, уларнинг кредит аризаларини кўриб чиқиш муддатлари (3 банк иш куни) кескин қисқартирилди. Хўжалик субектларининг корпоратив пластик карталардан фойдаланган ҳолда харид қилган товар (иш, хизмат)лар учун тўлов терминаллари орқали амалга оширган чеклари бирламчи бухгалтерлик ҳужжатларига тенглаштирилди. Уларга банк муассасаларига энг кам иш ҳақининг йигирма баробари миқдоригача бўлган нақд пул тушумини мустақил топшириш ҳуқуқи берилди.

Бундан ташқари, микрофирмалар ва кичик корхоналар ўзи ишлаб чиқарган товар (иш, хизмат)ларни экспорт қилишдан тушадиган валюта тушумининг 50 фоизини мажбурий сотишдан озод этилди. Шунингдек, уларга валюта тушумини белгиланган тартибда банк кассаларига кирим қилиш шарти билан маҳсулотларни нақд хорижий валютага сотишга, яъни экспорт қилишга рухсат берилди.

Банклар бизнес муҳитни яхшилаш, аҳоли ва тадбиркорларга сифатли хизматлар кўрсатиш борасида етарлича чора-тадбирлар кўриб бормоқдалар. "Ишонч телефонлари”га келиб тушаётган ҳар бир мурожаатни зудлик билан ҳал этиш тизими йўлга қўйилди. Банклар, бугунги кунда ўзаро муносабатларда тадбиркорлар ҳуқуқлари устуворлиги принципига амал қилмоқда.

Банкларнинг бугунги фаолияти ишбилармонлик муҳитини янада яхшилаш, бозор ислоҳотларини либераллаштириш ва чуқурлаштириш йўлида жадал ҳаракат қилиш, кичик бизнес ва хусусий тадбиркорликни ривожлантириш йўлидаги тўсиқ ва ғовларни бартараф этиш, унинг мамлакат иқтисодиётидаги роли ва улушини ошириш, экспорт салоҳиятини ривожлантириш, аҳоли бандлиги ва даромадларини таъминлашга қаратилган.

Хусусий тадбикорлик ва оилавий бизнес ҳар қандай катта бизнеснинг асосидир. Таъкидландики, “Оила йили”да ҳам меҳнат ресурслари ортиқча бўлган туманларда (Каттақўрғон, Қўшработ) жойлашган тадбиркорлик субъектларига имтиёзли кредитлар ажратиш кенгайтирилади. Қишлоқ жойларда ишлаб чиқариш инфраструктурасини ривожлантиришга алоҳида эътибор қаратилади. Хусусий тадбиркорлар ва касаначиликнинг саноат корхоналари билан кооперациялашуви рағбатлантирилади. Бинобарин, кредит маблағлари мамлакат иқтисодиётини барқарор юксалтириш, ўрта мулкдорлар синфини шакллантириш, янги иш ўринлари яратиш ва аҳоли даромадини оширишнинг муҳим омили бўлиб қолади.

Форум давомида 2011 йилда “Энг яхши тадбиркор” номинацияси бўйича ғолиб деб топилган 15 та тадбиркор қимматбаҳо совғалар билан тақдирланди.

Тижорат банклари томонидан “Энг яхши бизнес лойиҳа” номинацияси бўйича 70 та лойиҳа эгасига 2012 йилда 20 млрд.сўм миқдорида кредитлар ажратиш бўйича сертификатлар топширилди.