ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ ҚАРОРИ

"Ўзбекистон Республикаси ҳудудида ломбардларни рўйхатдан ўтказиш ва улар фаолиятини лицензиялаш масалалари тўғрисида” 2003 йил 17 сентябрь, 402-сон

Ўзбекистон Республикаси Фуқаролик кодексининг 289-моддасига, «Ўзбекистон Республикаси Марказий банки тўғрисида»ги Ўзбекистон Республикаси Қонунининг 50-моддасига, Вазирлар Маҳкамасининг «Фаолиятнинг айрим турларини лицензиялаш тўғрисида»ги Ўзбекистон Республикаси Қонунини амалга ошириш чора-тадбирлари ҳақида» 2002 йил 28 июндаги 236-сон қарорига мувофиқ ҳамда Ўзбекистон Республикаси ҳудудида ломбардларни рўйхатдан ўтказиш ва улар фаолиятини лицензиялашни тартибга солиш мақсадида Вазирлар Маҳкамаси қарор қилади:

1. Ихтисослаштирилган ташкилотлар — ломбардларни давлат рўйхатидан ўтказиш функцияси адлия органларига юклансин.

Белгилансинки:

Ўзбекистон Республикаси Адлия вазирлиги Тошкент шаҳрида жойлашган ломбардларни давлат рўйхатидан ўтказади;

Қорақалпоғистон Республикаси Адлия вазирлиги ва вилоятлар адлия бошқармалари тегишли равишда Қорақалпоғистон Республикаси ва вилоятлар ҳудудида жойлашган ломбардларни давлат рўйхатидан ўтказади.

2. Белгилаб қўйилсинки:

ломбардлар адлия органлари томонидан давлат рўйхатидан ўтказилганлиги учун қонун ҳужжатларида тўлов кунида белгиланган энг кам ойлик иш ҳақининг тўрт баравари миқдорида давлат божи ундирилади;

лицензияловчи орган томонидан лицензия талабгорининг аризаси кўриб чиқилганлиги учун ариза берилган кунда қонун ҳужжатларида белгиланган битта энг кам ойлик иш ҳақи миқдорида йиғим ундирилади;

ломбардлар фаолиятини амалга ошириш ҳуқуқини берувчи лицензия берилганлиги учун тўлов кунида қонун ҳужжатларида белгиланган энг кам ойлик иш ҳақининг беш баравари миқдорида давлат божи ундирилади.

Ломбардлар давлат рўйхатидан ўтказилганлиги учун тўланадиган давлат божи суммаси белгиланган тартибда тақсимланади.

3. Марказий банк томонидан белгиланган тартибда тасдиқлаш учун:

ломбардлар фаолиятини лицензиялаш тартиби тўғрисидаги низом;

фуқароларга тегишли бўлган ашёлар гаровга қўйилган ҳолда ломбардлар томонидан фуқароларга кредит бериш қоидалари;

ломбардлар томонидан ҳисоботлар тақдим этиш тартиби ишлаб чиқилганлиги маълумот учун қабул қилинсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р. С. Азимов ва Марказий банк раиси Ф. М. Муллажонов зиммасига юклансин.

Ўзбекистон Республикасининг Бош вазири
Ў. СУЛТОНОВ

Тошкент ш.